Fyrstu dagana getur þú verið með óþægindi í hnénu og þá er best að taka t.d. Paracetamol og Ibufen, sem hægt er að fá án lyfseðils. Ef þau duga ekki skalt þú hafa samband við lækni.
Saumar eru í hnénu, sem á að taka 10 – 12 dögum eftir aðgerðina. Hægt er að koma í saumatöku á Læknastofur Akureyrar og skaltu þá hafa samband þangað í síma 462-2000 til að fá tíma. Einnig getur þú gert aðrar ráðstafanir varðandi saumatöku.
Teygjubindi er á hnénu auk plástra innst. Bindið á að halda þægilega þétt við hnéð, við aukna verki er rétt að losa um bindið.
Þér er óhætt að fara í sturtu daginn eftir aðgerð, þú tekur teygjubindið af og skiptir svo um plástra á eftir og vefur aftur teygjubindinu um hnéð.
Slepptu alveg að fara í baðkar, sund og heita potta á meðan sárið er að gróa (2–3 vikur).
Þú mátt stíga í fótinn og beygja að sársaukamörkum strax eftir aðgerð. Ef verkir leyfa þá er óhætt að fara að stunda líkamsrækt eftir ca. 2-3 vikur.
Reiknaðu með að vera frá vinnu í 1–3 vikur en það miðast líka við hvað var gert í aðgerðinni og við hvað þú starfar.
Hafðu samband við lækni ef það fer að bera á mikilli bólgu, roða eða auknum verkjum.
Ef eitthvað kemur upp á fyrsta sólarhringinn eftir aðgerð er neyðarsími Læknastofu Akureyrar 8425333.